Detaje të reja janë mësuar në lidhje me grabitjen e pasdites së kësaj të mërkure (22 nëntor) në Suharekë të Kosovës.
Mësohet se nga grabitja e armatosur, autorët kanë arritur të marrin florinj që konsiderohen të jenë të një vlere prej 250 mijë euro.
“Nuk është bërë vlerësim zyrtar i shumës së grabitur në argjendari. Në bazë të dhënave të para të marra nga pronari i biznesit të grabitur shuma mund të jetë rreth 250 mijë euro”, ka deklaruar prokurorja Ervehe Gashi për Telegrafin.
Sipas informacionit zyrtar të policisë ngjarja ka ndodhur rreth orës 15:45 dhe sapo patrulla ka mbërritur në vendngjarje të dyshuarit kanë shtënë me armë zjarri në drejtim të efektivëve.
Për pasojë, një zyrtar policor është plagosur lehtë nga arma e zjarrit, ndërsa një tjetër është lënduar gjatë aksionit.
Dyshohet se autorët ishin katër dhe se kanë përdorur një makinë me targa të vjedhura.
Vijon puna për identifikimin dhe kapjen e tyre.
